
Musikki- ja teatterikirjastosta / Musik- och teaterbiblioteket
Tervetuloa koko Ruottin spesiaalikirjasthoon musikille, teatterille ja tansile.
Auki kaikile
Musikki- ja teatterikirjasto oon auki kaikile. Meän lainaajitten seurassa oon niin privattihenkilöitä, kulttuurintekiöitä ko opettajia, opiskelioita ja tutkioita.
Täälä oon kauhean paljon lainaamista aihneissa musikki, teatteri ja tansi. Meilä oon kansa suuri kokoelma ynikkiä ja histuurista materiaalia. Met jokka olemä töissä kirjastossa autama sinua mielelhääns löythään mitä sie haet.
Lainaa ja laajaa alle koko maassa
Lainakortti meilä antaa sulle saatavuuen sathointuhanshiin kirhjoin ja nuothiin, rapehaan 40 000 pjääsimaanykshiin, sathoin avishiin ja usseishiin musikki- ja teatteritaattapaashiin.
Sie saatat lainata meiltä missä sie vain olet Ruottissa sinun paikalisen kirjaston kautta. Lue lissää kaukolainaamisesta. (LÄNK).
Täälä webilä sie saatat laajata alle tikitaalia nuottia (LÄNK) kirjaston kokoelmista ja kirjottaa ulos kotona. Sie saatat kansa käyttää tikitaliseeratuita valokuvia meän kokoelmasta ja vissiä arkiivimateriaalia (LÄNK).
Käy meilä Stokholmissa
Musikki- ja teatterikirjasto oon osotheela Tegeluddsvägen 100 Stokholmissa. Täälä sie saatat saaja apua hakheen nuottia, kirjalisuutta, sisälepellauksia ja arkiivimateriaalia. Sie saatat kansa kopieerata elikkä skannata materiaalia ommaa käyttöä varten.
Kirjastossa oon lukuhuone, varattavia ryhmähuohneita ja huohneita joissako sie saatat kuunella musikkia, kattoa filmiä elikkä pelata keyboardia. Meilä oon ilhmainen wifi.
Ynikki ja histuurinen materiaali
Kirjaston arkiivissa ja kokoelmissa oon materiaalia henkilöitten, föreninkitten ja institysuunitten jälkhiin jokka oon toiminheet seenitaitealuheela. Täälä sie saatat muun muassa löytää preiviä, käsikirjotettuja nuottia ja manyskriptiä, ensinki 1500-1800-luvuilta. Vanhiin käsikirjotus oon viikattu plaavi jossako oon kirkkomusikkia suunile vuelta 1150. Kirjastolla oon kansa suuri kokoelma valokuvia.
Osan materiaalista löytää tikitaliseerattuna ja haettavanna meän taattapaasissa (LÄNK). Ota mielelhääns meän kansa yhtheyttä (LÄNK) ette saaja apua ette hakea kokoelmista ja ette saaja saatavuuen materiaahliin.
Kirjaston histuuria
Meän histuuria ulttuu yli 250 vuotta taapäin. Alusta kirjasto oli osa Kuninkhaalisesta Musikaalisesta Akatemiista joka perustethiin vuona 1771. Vuona 1849 kirjasto aukasthiin ylheisölle.
Tänäpäivänä kirjastossa oon koko seenitaitealue ja se kuuluu virasthoon Valtion musikkilaitos/Statens musikverk.